មានទស្សនៈមួយបានលើកឡើងថា «មួយជាតិរៀបការម្តង ត្រូវធ្វើវាអោយណាណី» ទំនងជាចង់សំដៅដល់ការតុបតែង រៀបចំពិធីការ អោយអធឹកអធម ហំហាន។ ប៉ុន្តែតាមការសង្កេតឃើញ ពិធីអាពាហ៌ពិពាហ៌ខ្មែរបច្ចុប្បន្នដូចជាមិនផ្តោតសំខាន់ខ្លាំងទៅលើពិធីប្រពៃណីណាស់ណាទេ គឺផ្តោតសំខាន់ទៅលើការតុបតែង និងការរៀបចំពិធីដែលត្រូវបានចំលងពីគេទៅវិញ។ តើអ្នកដឹងទេ ការចំណាយពិតជាធំសំបើមណាស់!
ពិតហើយ តើអ្នកជាភ្នាក់ងារឯកជនរៀបចំមង្គលការមែនទេ? តើអ្នកជាកូនក្រមុំកូនកំលោះមែនទេ? ចឹងតើអ្នកបានត្រៀមសម្រាប់ការតុបតែងក្នុងថ្ងៃអាពាហ៌ពិពាហ៌ហើយ រឺនៅ? តាមទំនៀមរបស់ខ្មែរ កូនក្រមុំត្រូវត្រៀមខ្លួនយ៉ាងហោចណាស់៣ខែ នៅក្នុងផ្ទះដើម្បីបន្ទុំស្បែកអោយភ្លឺថ្លា ក្មេងខ្ចី។ សម្រាប់ទំនៀមខ្មែរសម័យទំនើប គេតែចូលទៅកាន់ហាងកែសម្ផស្សទំនើបៗ ចំណាយលុយពេញៗដៃដើម្បីកែច្នៃស្បែកអោយស្រស់ស្អាត។
ចំនែកការតុបតែងខ្លួនក្នុងថ្ងៃរៀបការវិញ ជាទូទៅគេតែងទៅរកភ្នាក់ងាររៀបចំ ដើម្បីតុបតែងដែលពាក្យខ្មែរហៅថា «ផ្នួង» ក្នុងតំលៃដ៏លើសលប់ ទៅតាមអ្វីដែលចង់បាន និងទៅតាមលទ្ធភាពរបស់ក្រុមគ្រួសារ។
និយាយពីការថតរូបវិញ ពេលបច្ចុប្បន្ននេះខ្មែរកំពុងមានទំនោរទៅរកពួកបស្ចឹមប្រទេស ដោយមានការថតរូបមុនថ្ងៃរៀងការ គេហៅថា «Pre-Wedding» ដោយកាន់តែបន្ថែមការចំណាយច្រើនឡើង ប៉ុន្តែក៏អាចធ្វើទៅតាមលទ្ធភាពផងដែរ។ Pre-Wedding បានធ្វើអោយគូស្នេហ៌ក្មេងៗពុះកញ្ជ្រោល ចង់ធ្វើអោយប្លែក ចង់ធ្វើអោយឡូយ ចង់បង្អួតគ្នា ប៉ុន្តែគំនិតសំខាន់ក្នុងរឿងនេះ ប្រហែលជាមានតិចតួចប៉ុណ្ណោះដែលបានដឹង។ យើងមិនព្យាយាមនិយាយពីគុណសម្បត្តិ និងគុណវិបត្តិនៃការថតរូបមុនថ្ងៃរៀបការទេ តែយើងនឹងផ្តល់គំនិតដើម្បីកាត់បន្ថយការចំណាយច្រើន។
គំនិត៥យ៉ាងសម្រាប់ថ្ងៃរៀបការ គឺជាវិធីដែលអាចជួយអោយលោកអ្នកសន្សំពេលវេលា សន្សំប្រាក់កាស់ កាត់បន្ថយការចំណាយ និងធ្វើអោយការចង់ចាំអនុស្សាវរីយ៌បានច្រើនច្រើនទៀតផង។ គំនិតទាំង5នោះមាន..៖
- ការថត Pre-Wedding៖ លោកអ្នកអាចពឹងពាក់ មិត្តភក្តិដែលមានកាមេរ៉ាទំនើប រឺប្រើប្រាស់ទូរស័ព្ទដៃទំនើបក៏បាន ហើយចេញទៅថតនៅកន្លែងកំសាន្តធម្មជាតិ ដែលមិនត្រូវការចំណាយប្រាក់ ជាមួយមិត្តភក្តិជិតស្និទ្ធឺ ធ្វើដូចជាការដើរលេងកំសាន្ត បង្កើតគំនិតសាមញ្ញៗដែលខ្លួនឯងនឹកឃើញ ហើយចងក្រងជារូបភាពដែលគ្មានការច្នៃប្រឌិតបន្ថែម។ សម្រាប់រូបថត អាពាហ៌ពិពាហ៌ (រូបតាំងមុខរោង) ច្បាស់ណាស់ថា លោកអ្នកអាចទទួលបានការថតដោយឥតគីតថ្លៃ ពីម្ចាស់ផ្នួង រឺជាងថតដែលត្រូវជួលមកក្នុងថ្ងៃរៀបការ។
- កូនក្រមុំ អាចសំងំបន្ទុំសាច់ តាមបែបខ្មែរបុរាណ ដោយមិនចាំបាច់ចេញទៅរកសេវាថែទាំនៅខាងក្រៅ។ ប្រើប្រាស់ក្បួនខ្មែរបុរាណ ដូចជា ការអប់ទឹកក្តៅ ការលាបប្រេងល្មៀត និងការចូលម្លប់ជាដើម…
- កូនកំលោះ អាចបបួលមិត្តភក្តិទៅដើរលេងនៅផ្សារ ទិញសំលៀកបំពាក់ដែលសាមញ្ញៗ យកមករកជាងកាត់ដេរអោយជួយច្នៃទៅតាមអ្វីដែលខ្លួនចង់បាន។ សូមកុំភ្លេចថា សំលៀកបំពាក់ធូរថ្លៃ ក៏អាចធ្វើអោយអ្នកសង្ហារដែរ បើសិនជាស្លៀកពាក់បានត្រឹមត្រូវ។
- ការតុបតែងរោងការ៖ ទាំងកូនកំលោះ និងកូនក្រមុំសុទ្ធតែបានដឹងថ្ងៃរៀបការជាស្រេចហើយ ហេតុអ្វី មិនព្រមនាំគ្នាទៅជ្រើសរើសផើងផ្កាធម្មជាតិ ផ្គាដែលដាំងាយដុះ ងាយចេញផ្ការ នៅតាមសួនលក់ផ្កាទៅ? លោកអ្នកចំណាយអស់ប្រមាណជា៥ រឺ៦ម៉ឺនរៀល.. លោកអ្នកអាចទៅជ្រើសរើសដោយខ្លួនឯង… អាចយកមកតុបតែងដោយខ្លួនឯង ដោយមិនចាំបាច់ចំណាយប្រាក់ច្រើន… ហើយផ្កាទាំងនោះនៅអាចរក្សាទុក ថែទាំ ដាំលំអរក្នុងផ្ទះបានទៅថ្ងៃក្រោយទៀត។
- ពិធីការតាមបែបខ្មែរ៖ បើសិនជាលោកអ្នកចង់កាត់បន្ថយការចំណាយលើពិធីផ្សេងៗ លោកអ្នកគួរអនុវត្តន៌តាមតែបែបទំនៀមការខ្មែរទៅបានហើយ។ អ្វីដែលលោកអ្នកត្រូវចំណាយច្រើនបំផុតនោះគឺ ការស្មគ្រចិត្តជ្រើសរើសយកវប្បធម៌ប្រពៃណីបរទេសមករៀបចំ.. ទាំងអ្នកខ្លះមិនទាំងដឹងពីអត្ថន័យវាថាយ៉ាងម៉េចផង ដូចជាពិធីកាត់នំ… ពិធីបោះបាច់ផ្ការ.. ពិធីបញ្ចុកនំអាពាហ៌ពិពាហ៌.. ជាដើម។ ជាគំនិត បើសិនជាលោកអ្នកគិតថា លោកអ្នកប្រើប្រាស់ពិធីរៀបការត្រឹមតែទំនៀមខ្មែរ ក៏ក្លាយជាប្តីប្រពន្ធពេញច្បាប់ហើយ តើត្រូវការពិធីដែលចំណាយលុយច្រើនទាំងនោះទៀតដើម្បីអ្វី?
យើងមិនប្រឆាំងចំពោះគំនិតដែលចង់បង្ហាញភាពហ៊ឺហារក្នុងពិធីមង្គលការរបស់លោកអ្នកទេ រាល់ការលើកឡើងខាងលើគឺគ្រាន់តែជាគំនិតដើម្បីកាត់បន្ថយការចំណាយ និងធ្វើអោយមានការចងចាំតែប៉ុណ្ណោះ។ មានរឿងមួយដែល សិរីសួស្តី ចង់ចោទសួរវិញថា «តើថ្ងៃរៀបការ និងថ្ងៃក្រោយរៀបការ មួយណាសំខាន់ជាង?»។
ចំលើយ មាននៅទីនេះ ឬបើលោកអ្នកចង់ដឹងច្រើនទៀត សូមស្វែងរកសៀវភៅ «ន័យជីវិត» ៕
