អ្នកទាំងអស់គ្នាគិតថា «ថ្ងៃរៀបការ» សំខាន់ណាស់មែនទេ? ប៉ុន្តែខ្ញុំវិញយល់ថា «ថ្ងែរៀបការមិនសំខាន់ណាស់ណាទេ សំខាន់គឺថ្ងៃក្រោយរៀបការ ព្រោះការរៀបការប្រើពេលតែមួយថ្ងៃ តែក្រោយរៀបការអ្នកត្រូវរស់នៅជាមួយគ្នាមួយជីវិត… ដូច្នេះអ្នកត្រូវឆ្លងកាត់រឿងគ្រប់បែបយ៉ាងជាមួយគ្នា..» ដូច្នេះ តើអ្នកបានត្រៀមខ្លួនគ្រប់គ្រាន់ហើយឬនៅ សម្រាប់ផ្លូវជីវិតមួយនេះ?
អ្នកត្រូវចងចាំថា «ថ្ងៃរៀបការ» គឺជាថ្ងៃចាប់ផ្តើមបើកទំព័រជីវិតថ្មីរបស់អ្នក។ បើអ្នកចង់អោយ «ថ្ងៃក្រោយរៀបការ» ប្រកបដោយសេរីមង្គលពិតប្រាកដ អ្នកត្រូវ លះបង់ អត់ទ្រាំ យល់ព្រម… ទោះជាអ្នកមិនចង់ក៏ដោយ…
- លៈបង់៖ កាលពីអ្នកនៅម្នាក់ឯង អ្នកមានទម្លាប់ជារបៀបម្នាក់ឯង ដូច្នេះទម្លាប់មួយចំនួនត្រូវលះបង់ដាច់ខាត។ ការលះបង់សំបកខាងក្រៅដូចជា លះបង់ទម្លាប់ចូលបន្ទប់ទឹកមិនបិទទ្វារ លះបង់ការអង្គុយយប់ជ្រៅ ការមើលភាពយន្ត ការស្តាប់តន្រ្តី បើសិនជាដៃគូរបស់អ្នកមិនចូលចិត្ត ហើយសំណូមពរអោយបញ្ឈប់។
- អត់ទ្រាំ៖ កាលពីនៅម្នាក់ឯង អ្នកអាចធ្វើអ្វីៗគ្រប់យ៉ាងដោយគ្មានអ្នកណាហាមឃាត់ ឬរអ៊ូរទាំ តែពេលអ្នករៀបការរួច រាល់ទង្វើឯករាជ្យទាំងនោះពិតជាជៀសមិនផុតពីការរអ៊ូរទាំ ឬស្តីបន្ទោស ឬមិនយកចិត្តទុកដាក់ ដូច្នេះអ្នកត្រូវអត់ទ្រាំ ឬឈប់ធ្វើវាតែម្តងទើបប្រសើរ។
- យល់ព្រម៖ អ្នកមានទម្លាប់ស្អាតបាត មានទម្លាប់ ដើរហើរ ឬមានទម្លាប់ញាំរបស់ហឹរ ជូរ ផ្អែមជាដើម ពេលនៅម្នាក់ឯង តែពេលរៀបការរួច ដៃគូរបស់អ្នកបែជាចូលចិត្តផ្ទុយពីអ្នក ដូច្នេះបើសិនជាអ្នកមិនព្រមលះបង់ចោលទម្លាប់ផ្ទាល់ខ្លួន ហើយដៃគូមិនព្រមទទួលយកទេ អ្នកទាំងពីរមានតែឆ្នាំងពីរចានពីរមិនខាន។
បញ្ជាក់៖ ចំនុចទាំង៣ខាងលើគឺគ្រាន់តែជាសំបកខាងក្រៅនៃជីវិតគូតែប៉ុណ្ណោះ តែវាក៏មានឥទ្ធិលខ្លាំងខ្លាទៅលើផ្លូវអារម្មណ៍ មនោសញ្ចេតនា ស្នេហា និងគ្រួសារផងដែរ។ បើសិនជាបុគ្គលចេះលះបង់ អត់ទ្រាំ យល់ព្រម អោយគ្នាទៅវិញទៅមក គេនឹងមើលឃើញពន្លឺសុភមង្គលរៀងដរាបដល់ចាស់កោងខ្នង។ ផ្ទុយពីនេះ បើទោះជាគេមានគ្រឹះស្នេហា គ្រឹះគ្រួសារ និងទ្រព្យសម្បត្តិដ៏រឹងម៉ាំយ៉ាងណាក៏ដោយ ក៏គេមិនអាចរក្សាជំហរគ្រួសារសុភមង្គលមួយបានដែរ។
សរុបមក ថ្ងៃរៀបការគឺគ្រាន់តែជាពិធីមួយតែប៉ុណ្ណោះ ប៉ុន្តែថ្ងៃក្រោយរៀបការទើបជាជីវិតពិតរបស់យើងគ្រប់គ្នា តើមែនទេ?
