ស្នេហា គឺការស្រលាញ់ជាប់ស្អិត.. នេះគឺជានិយមន័យក្នុងវចនានុក្រមសម្តេចសង្ឃរាជ ជួន ណាត ជោតញ្ញាណោ។ ការស្រលាញ់ជាប់ស្អិត គឺសំដៅទៅលើ ស្រលាញ់អ្វីៗគ្រប់យ៉ាង ទោះល្អ រឺអាក្រក់ មានរឺក្រ មានយសរឺអត់យស.. ប៉ុន្តែបើសិនជាការស្រលាញ់ជាប់ស្អិតនេះត្រូវបានបំផ្លាញ តើវានឹងមានអ្វីកើតឡើង?។ ជាការពិតណាស់ ដំបូងគេនឹងជួបបញ្ហាមួយគឺ «ខូចចិត្ត»។
«ខូចចិត្ត» ជាប្រភេទជំងឺមួយដែលជាទូទៅគេតែងដឹងថា វាកើតឡើងដោយសារតែការបែកបាក់ស្នេហា ការផិតក្បត់ ការលែងលះ រឺការស្លាប់។ បើសិនជាអ្នកស្រាប់តែដើរដល់ចំនុចទាំងនេះ តើអ្នកត្រូវធ្វើដូចម្តេចដើម្បីកាត់បន្ថាយការឈឺចាប់? ខាងក្រោមនេះ ជាវីធីងាយៗ ៥យ៉ាងដែលអាចជួយអោយការខូចចិត្តរបស់យើងបានធូរស្រាលឡើងវិញ..៖
- ផ្តល់ពេលវេលាអោយខ្លួនឯង៖ ជាការពិតពេលដែលអ្នកឈានដល់ការបែកបាក់ បាត់បង់ ជាពិសេសស្នេហា អ្នកពិតជាមានការឈឺចាប់ខ្លាំងណាស់ ដូច្នេះដើម្បីបំបាត់ការឈឺចាប់ទាំងនេះ អ្នកតែងតែបង្ខំខ្លួនឯងអោយបោះបង់ពេលវេលា ទៅដើរលេង ផឹកគ្រឿងស្រវឹង រឺចូលទៅកាន់ទីស្ងប់ស្ងាត់តែម្នាក់ឯង។ ទាំងនេះជាមធ្យោបាយមិនល្អទេ ព្រោះលោកអ្នកកំពុងតែធ្វើបាបខ្លួនឯងយ៉ាងពិតប្រាកដ។ ប្រការដែលល្អ អ្នកត្រូវផ្តល់ពេលវេលាល្អៗអោយខ្លួនរបស់អ្នក ដូចជាការជជែកលេងនឹងមិត្តភក្តិ ការអានសៀវភៅ ការស្តាប់ចំរៀងសប្បាយៗ និងព្យាយាមនៅអោយឆ្ងាយពីកន្លែងដែលអ្នកគិតថា ជាកន្លែងអនុស្សាវរីយ៌។
- កុំព្យាយាមស្វែងរកការទំនាក់ទំនងជាមួយដៃគូរបស់អ្នក៖ ពិតណាស់ ពេលដែលបែកបាក់ស្នេហា ជាពិសេសការបែកបាក់ដែលអាចមកពីការយល់ច្រឡំ អ្នកគួរតែស្វែងរកវិធីទាក់ទងគ្នាឡើងវីញ ដោយចាប់ផ្តើមពីការកសាងមិត្តភាព ប៉ុន្តែបើសិនជាការបែកបាក់ដោយការផិតក្បត់ ការមិនទទួលខុសត្រូវ ការលែងលះដោយការអស់ចិត្ត អ្នកមិនគួរព្យាយាមស្វែងរកទំនាក់ទំនងទៀតទេ បើសិនជាអ្នកមិនចង់បន្តការឈឺចាប់។ មធ្យោបាយដែលល្អបំផុតគឺ ត្រូវនៅជាមួយគ្រួសារ មិត្តភក្តិ រឺសាច់ញាតិដែលអ្នកទុកចិត្ត និយាយរឿងថ្មីៗ ធ្វើរឿងថ្មីៗ ជួបមិត្តភក្តិថ្មី ទៅកាន់កន្លែងថ្មីៗ ដើម្បីប្រមូលយករូបភាពទាំងនោះ មកផ្លាស់ប្តូរការចងចាំរបស់អ្នក។
- កុំប្រឆាំងនឹងអារម្មណ៌របស់អ្នក៖ ត្រឹមត្រូវណាស់ អារម្មណ៌ពេលបែកវានឹងធ្វើអោយយើងឈឺចាប់រកស្មានមិនត្រូវ។ ជានិច្ចជាកាលអ្នកនៅតែនឹកគេ នៅតែគិតដល់គេ នៅតែចង់ជួបគេ ប៉ុន្តែអ្នកមិនអាច ហើយតែងបង្ខំខ្លួនឯងដោយវិធីផ្សេងៗ។ វាហាក់ដូចជាប្រឆាំងនិងចំនុចទី២ខាងលើ ប៉ុន្តែអ្នកកុំប្រឆាំងនិងអារម្មណ៌ពិតរបស់ខ្លួនឯង បើសិនជាអ្នកនឹកគេ រឺមានអ្វីមិនលះបង់ជាមួយគេ អ្នកត្រូវនិយាយរឿងនេះប្រាប់មិត្តភក្តី ឳពុកម្តាយ រឺសាច់ញាតិដែលអ្នកទុកចិត្ត អោយគេជួយរកមធ្យោបាយ ប៉ុន្តែត្រូវជៀសវាងចំនុចទី១។
- រៀបគំរោងថ្មី៖ វាមិនមែនជាការដោះដៃឆាប់រហ័ស រឺព្រោះតែយើងមានគំរោងល្អជាង ទើបត្រូវបែកបាក់ជាមួយដៃគូចាស់នោះទេ។ អ្វីដែលអ្នកត្រូវធ្វើដើម្បីកុំអោយមានការឈឺចាប់ខ្លាំង អ្នកត្រូវរៀបចំំគំរោងល្អមួយ។ អ្នកត្រូវធ្វើរឿងដែលអ្នកចូលចិត្តបំផុត អាចថាក្នុង១សប្តាហ៌អោយបានម្តង ជាពិសេសអ្នកត្រូវគិតពីអ្វីដែលអ្នកត្រូវការ ហើយជាជំរើសដែលអ្នកចូលចិត្តបំផុត រួចចាប់ផ្តើមធ្វើវាអោយល្អ។
- ថែរក្សាសុខភាពរបស់អ្នក៖ ជាការពិត ពេលខ្លះដោយការឈឺចាប់ខ្លាំងពេក អ្នកអាចនឹងធ្វើខ្លួនអោយរងការឈឺចាប់ ដូចជាប៉ុនប៉ងសម្លាប់ខ្លួន ការបង្ខាំងខ្លួនឯងនៅក្នុងបន្ទប់ ការគេចវេសពីការពិតជាដើម។ នៅទីនេះ យើងសូមប្រាប់ថា វិធីទាំងនេះមិនល្អសម្រាប់អ្នកនោះទេ អ្វីដែលល្អបំផុតគឺ អ្នកត្រូវផ្តល់ពេលវេាលគ្រប់គ្រាន់អោយខ្លួនឯង រស់នៅដូចជាថ្ងៃធម្មតា ជួបជជែកជាមួយមិត្តភក្តិដូចរាល់ដង និងថែរក្សាសុខភាពរបស់អ្នកអោយល្អ ដើម្បីរងចាំពេលវេលាថ្មីក្នុងឆាកជីវិតរបស់អ្នកមកដល់។
នៅទីនេះ ខ្ញុំហ៊ាននិយាយថា ជំងឺ «ខូចចិត្ត» គ្មានថ្នាំព្យាបាលទេ គឺមានតែខ្លួនអ្នកប៉ុណ្ណោះ ដែលអាចព្យាបាលខ្លួនឯងបាន ដូច្នេះក្នុងនាមជាអ្នកជំងឺផង ជាគ្រូពេទ្យផង អ្នកអាចលំបាកក្នុងការអនុវត្តន៌បន្តិច ប៉ុន្តែបើសិនជាអ្នកធ្វើវាបាន អ្នកគឺជាមនុស្សដែលខ្លាំងបំផុត ហើយជីវិតលោកអ្នកនឹងជោគជ័យទៅថ្ងៃក្រោយ៕
