ពេលភ្ញាក់ពីគេង តើលោកអ្នកត្រូវធ្វើអ្វីមុនគេ? ការពិតណាស់អ្នកដែលមានទម្លាប់ហាត់ប្រាណ គឺច្បាស់ជាប្រញ៉ាប់ក្រោកពីព្រឹកបន្តិចដើម្បីហាត់ប្រាណអោយទៀងទាត់ ដែលនេះគឺជារឿងល្អជាទីបំផុត សូមសរសើ! ប៉ុន្តែអ្នកខ្លះទៀត មិនដូច្នេះទេ តើមែនទេ?
សូមងាកមកគិតសារជាថ្មី ក្នុងការកែប្រែទម្លាប់នៃការរស់នៅប្រកបដោយសុខភាពល្អ ដែលក្នុងនោះរាប់ចាប់ផ្តើមតាំងពីភ្ញាក់ពីគេងរហូតដល់ពេលគេងវិញ។ ដូច្នេះទំព័រសិរីសួស្តី សូមលើកយកចំនុច៥ដែលលោកអ្នកមិនគួរធ្វើនៅពេលព្រឹក…៖
១. បំភ្លេចអាហារពេលព្រឹក
ការពិតណាស់ ក្រពះរបស់អ្នកបានធ្វើការអស់ពេញមួយយប់ហើយ ហើយអ្វីៗក៏បានស្រូបទាញយកអស់ហើយដែរ ដូច្នេះក្រពះរបស់អ្នកគឺប្រាកដជានៅសល់តែអាស៊ីត និងកាកសំណល់ខ្លះ ដូច្នេះបន្ទាប់ពីភ្ញាក់ពីគេងយ៉ាងហោចណាស់១ម៉ោង រឺ២ម៉ោង អ្នកត្រូវតែទទួលទានអាហារពេលព្រឹក កុំរំលងវាអោយសោះ។
២. គេងមើលទូរស័ព្ទ
ភាគច្រើនបំផុត រាល់ពេលភ្ញាក់ពីគេងលោកអ្នកជាច្រើនតែងស្រវ៉ារកទូរស័ព្ទមុនគេ ដោយហោចទៅក៏ដើម្បីមើលម៉ោងដែរ តើមែនទេ? ប៉ុន្តែអ្នកជំនាញបានហាមចំពោះរឿងនេះ ពីព្រោះការបើកភ្នែកឡើង ហើយសំលឹងមើលពន្លឺដែលចេញពីទូរស័ព្ទ និងធ្វើអោយប្រព័ន្ធការពារភ្នែករបស់យើងចុះខ្សោយ។ ដូច្នេះ រងចាំ ៣០នាទីក្រោយពីភ្ញាក់ពីគេង ចាំមើលទូរស័ព្ទ។
៣. មិនព្រមផឹកទឹក
ការផឹកទឹកមួយកែវ ពេលព្រឹក នៅតែជារឿងពិបាកនៅឡើយចំពោះមនុស្សជាច្រើន ព្រោះគេយល់ថាវាពិបាកលេប និងធ្វើអោយមូលពោះទៀតផង។ ប៉ុន្តែអ្នកឯកទេសបានប្រាប់ថា អ្នកគួរតែផឹកទឹកស្អាតមួយកែវ ជាពិសេសទឹកក្តៅឧណ្ហៗ នៅពេលក្រពះយើងទទេ ដើម្បីជួយសម្រួល រឺជួយដាស់កោសិការក្រពេញក្រពះអោយក្រោកឡើងដើម្បីត្រៀមរងចាំអាហារនៅពេលបន្តិចទៀតនេះ។ សូមសាកល្បងកែប្រែពីពេលនេះទៅ ផឹកទឹកមួយកែវពេលភ្ញាក់ពីគេង គឺពិតជាមានប្រយោជន៌ដល់សុខភាព នឹកស្មានមិនដល់។
៤. ផឹកកាហ្វេ
អ្នកខ្លះ មិនព្រមផឹកទឹកទេ តែផឹកកាហ្វេជំនួសវិញ។ ការធ្វើបែបនេះគឺមិនល្អនោះទេ ពីព្រោះការផឹកកាហ្វេនៅពេលក្រពះយើងទទេ វានឹងធ្វើអោយសម្ពាធឈាមរបស់យើងឡើងខ្ពស់ ហើយអ្នកអាចប្រឈមមុខនិងការកើតមានជំងឺបេះដូងគ្រប់ពេលទៀតផង។ សូមរងចាំ២ រឺ៣ម៉ោង បន្ទាប់ពីភ្ញាក់ពីគេងចាំទទួលទានកាហ្វេ។
៥. រៀបចំគ្រែបន្ទាប់ពីក្រោកពីគេង
ការពិតណាស់ អ្នកមានទម្លាប់ស្អាតបាត ដូច្នេះក្រោយពេលក្រោកពីគេងភ្លាមអ្នកក៏សំអាតគ្រែគេង មានរលាស់កំរាលពូក រឺកន្ទេល និងភួយរៀបចំអោយស្រួលបួលហើយទើបចេញធ្វើកិច្ចការផ្សេងៗ ប៉ុន្តែការធ្វើបែបនេះគឺមិនត្រូវនោះទេ ពីព្រោះនៅក្រោយពេលសម្រាកសម្រានមួយយប់ គ្រែគេងរបស់យើងមានជាប់ដោយបាក់តេរីអាក្រក់ជាច្រើន អាចចេញពីមកញើស មកពីធូលី រឺមកពីសត្វល្អិតពេលយប់ ដូច្នេះសូមបើកបង្អូចយកពន្លឺថ្ងៃ និងរងចាំ១ម៉ោងក្រោយចាំរៀបចំបន្ទប់។
