ត្រង់ចំនុចនេះ សម្រាប់នារីសម័យថ្មីអាចថាមិនចោទជាបញ្ហាអ្វីទេ ព្រោះទំនោរសង្គមបច្ចុប្បន្នបានដើរមកដល់ដំនាក់កាលមួយដែលមនុស្សគ្រប់គ្នារវល់ពេញៗមួយថ្ងៃ សឹងតែរកពេលដកដង្ហើមមិនបាន ដូច្នេះការស្វែងរកស្នេហា ឬគូជីវិតក៏គង់យឺតយ៉ាងទៅតាមហ្នឹងដែរ។
ដែលរាប់ថាចាស់ពេកនេះ គឺសំដៅដល់បុរសដែលជរាទ្រីកទ្រើក ហៀបតែមរណាទៅហើយនោះ តែប្រាថ្នាស្រីក្មេងមកជាប្រពន្ធ តើមានស្រីឯណានិងពេញចិត្តបុរសចាស់របៀបនេះ? សមតាមពាក្យក្នុង បទបរាភវសូត្រ ត្រង់វិនាសប្រការទី១០ ដែលថា «បុរសមានវ័យ ដែលចាស់ហួសពេក ហើយមានតម្រេកដោយក្តីតណ្ហា នាំយកស្រីក្មេងមកធ្វើភរិយា ហេតុនេះទៅជា នាំឲ្យវិនាស»។ ផ្សេងពីនេះ ក្នុងភាសិតគតិលោក ក៏បានលើកឡើងផងដែរថា «ពន្លឺត្រជាក់នៃព្រះច័ន្ទមិនជាទីពេញចិត្តនៃមនុស្សរងា ពន្លឺក្តៅនៃព្រះអាទិត្យក៏មិនជាទីពេញចិត្តនៃមនុស្សក្តៅក្រហល់ក្រហាយ យ៉ាងណាម៉ិញ បុរសដែលមានវ័យចាស់គ្រាំគ្រា ទ្រុឌទ្រោម ក៏មិនជាទីពេញចិត្តនៃនារីក្មេង ដូចគ្នាដែរ»។
ប៉ុន្តែក្នុងប្រការនេះ តាមសេចក្តីអត្ថាធិប្បាយនៃគម្ពីរវិនាស១២ប្រការនោះបានលើកឡើងផងដែរថា ទោះជាយ៉ាងណាក៏ដោយ មិនមែនការសម្រេចចិត្តបែបនេះសុទ្ធតែជារឿងមិនល្អទាំងអស់នោះឡើយ ប្រសិនបើគូស្នេហ៍ទាំងពីរគឺ ជាមនុស្សមានចិត្តស្មោះ និង ចេះសណ្តោសចំពោះគ្នា ពិតប្រាកដមែន នោះពួកគេនឹងមានសុភមង្គលអស់មួយជីវិត។ មានឧទាហរណ៍ច្រើនណាស់ដែលបានឆ្លុះបញ្ចាំង និងទូន្មានមនុស្សជំនាន់ក្រោយឲ្យចេះសម្រេចចិត្តត្រឹមត្រូវទាក់ទងនឹងការជ្រើសរើសគូកំណាន់ខុសវ័យគ្នានេះ ។
ប៉ុន្តែទស្សនៈមនុស្សជំនាន់ថ្មីលើចំនុចនេះក៏បានលើកឡើងផងដែរថា «អាយុគ្រាន់តែជាតូរលេខប៉ុណ្ណោះ ស្នេហាមិនប្រកាន់អាយុនោះទេ»។
