សម្រាប់បុរសទាំងឡាយ ការជ្រើសរើសនារីណាម្នាក់មកជាគូជីវិត ក៏ទុកជារឿងពិបាកមួយដែរ។ ពេលខ្លះ គេបានសាកល្បងធ្វើទំនាក់ទំនងជាមួយមនុស្សស្រីច្រើននាក់ ដើម្បីស្វែងរកនារីតែម្នាក់មកជាគូជីវិត វាជារឿងគួរឲ្យស្អប់ខ្ពើម តែបើគេរកមិនឃើញទេ គេនៅតែបន្តធ្វើវាឥតឈប់រហូតទាល់តែរកឃើញ។ ប៉ុន្តែសម្រាប់បុរសល្មោភកាមមួយចំនួន បើទោះជាខ្លួនរកបានភរិយាដែលសក្តិសមហើយ ក៏គេនៅតែមិនចោលចរិតស្រីច្រើននោះដែរ។ បុរសប្រភេទនេះ ពុំគួរឲ្យគេសរសើនោះទេ បើទោះជាមានគុណសម្បត្តិច្រើនក្តី។
ដោយឡែកក្នុងនាមជាស្រ្តី តើគួរត្រៀមខ្លួនអ្វីខ្លះដើម្បីក្លាយខ្លួនជាភរិយារបស់បុរសណាម្នាក់។ តើយើងត្រូវធ្វើភរិយាប្រភេទណា? ក្នុងភរិយាទាំងប្រាំពីរដែលព្រះពុទ្ធទ្រង់សំដែងដូចខាងក្រោម៖
- វធសមាភរិយា ភរិយាត្រេកអរបុរសដទៃ (មានសហាយ) មើលងាយប្ដី ខ្វល់ខ្វាយសម្លាប់ប្ដី។
- ចៅរីសមាភរិយា ភរិយាលួចទ្រព្យពីផ្ទះ (ទ្រព្យដែលប្ដី រកបានមកហើយ លួចយកទៅផឹកស្រាលេងល្បែងចាយវាយផ្ដេសផ្ដាស)។
- អយ្យសមាភរិយា ភរិយាធ្វើការកៀបសង្កត់ប្ដី ឲ្យនៅក្នុងអំណាចខ្លួន (ភរិយាខ្ចិលច្រអូស ស៊ីច្រើន រឹងរូស កាចពោលពាក្យអាក្រក់ ប្រព្រឹត្តគ្របសង្កត់នូវប្ដី ដែលមានព្យាយាមប្រឹងប្រែង)។
- មាតុសមាភរិយា ភរិយាចេះរក្សាប្ដីដូចមាតារក្សាកូន (ភរិយាមានសេចក្ដីអនុគ្រោះនូវប្រយោជន៍ សព្វ ៗ កាលហើយរក្សានូវទ្រព្យដែលប្ដីបានមកអំពីទីផ្សេងៗ) ។
- ភគិនិសមាភរិយា ភរិយាគោរពប្ដីដូចប្អូនស្រីគោរពបងប្រុស (ភរិយាមានសេចក្ដីអៀនខ្មាសប្រព្រឹត្តទៅតាមអំណាចនៃភស្ដា)។
- សខីសមាភរិយា ភរិយាដូចសម្លាញ់ (ភរិយាបានឃើញនូវប្ដីហើយក៏រីករាយ ដូចសម្លាញ់បានឃើញសម្លាញ់ដែលមកអស់កាលយូរ ស្ត្រីនោះ បរិបូណ៍ដោយត្រកូលមានសីលធម៌ជាស្ត្រីមានវត្តប្រតិបត្តិក្នុងប្ដី)។
- ទាសិសមាភរិយា ភរិយាដូចអ្នកបម្រើ (ភរិយាដែលប្ដី ជេរវាយ គម្រាមដោយដំបង មិនមានចិត្តប្រទូស្ដវិញចេះអត់សង្កត់ចិត្ត មិនក្រោធខឹងនឹងប្ដី ប្រព្រឹត្តទៅតាមអំណាចប្ដី)។
នេះជាភរិយាទាំងប្រាំពីរពួកក្នុងលោក ក្នុងនាមយើងជាស្ត្រីត្រូវជ្រើសរើសខ្លួនឯងឲ្យទៅជាភរិយាទីប៉ុន្មានសម្រាប់គ្រួសារយើង។
