និយាយរួម និងដោយពិតទៅ រូបសម្ភស្សស្អាត សម្រាប់បុរសគឺគ្រាន់តែជាទ្រនាប់ ឬគ្រាន់តែជាបង្អែមមួយចានក្រោយអាហារតែប៉ុណ្ណោះ ព្រោះនៅទីបំផុតបុរសទាំងឡាយនៅតែជ្រើសរើសនារីដែលមានសមត្ថភាព ចេះគ្រប់គ្រងផ្ទះនិងគ្រួសារ ឬសេដ្ឋកិច្ច និងមានអត្តចរិតថ្លៃថ្នូរ មិនមើលងាយគេឯង និងគ្រួសារគេ មកធ្វើជាប្រពន្ធស្របច្បាប់ដដែល តែបើបានជាមានទាំងអត្តចរិតល្អ និងថែមទាំងស្រស់ស្អាតទៀតផងនោះ គឺច្បាស់ជាគេងប់ ជាប់ ងាប់ក្រោមកន្ទុយក្បិន([1])មិនខាន… នេះជាការពិត!
ព្រះពុទ្ធជាម្ចាស់ ត្រាស់សំដែងថា «សូមតំកល់ខ្លួនឲ្យស្មើតាមអ្វីដែលអ្នកមាន» មានន័យថា កុំស្រវ៉ាចាប់យករបស់ដែលខ្លួនឯងគ្មានលទ្ធភាពនឹងចាប់យក ព្រោះវាបានវិញតែការការកើតទុក្ខ មិនសុខចិត្តតែប៉ុណ្ណោះ។
ម្នាលនារីៗស្អាតៗទាំងឡាយ បុរសល្អមិនមែនសម្រាប់នារីស្អាតតែសំបកក្រៅទេ ព្រោះបុរសល្អ គឺជារតនសម្បត្តិសម្រាប់នារីៗគ្រប់រូប ដូច្នេះបើសិនជាចង់បានបុរសល្អមកជារបស់ខ្លួន ចូរសួរខ្លួនឯង មើលខ្លួនឯងសិនថា តើខ្លួនឯងពិតជាសក្តិសម និងបុរសល្អទាំងនោះដែរឬទេ? ហើយតើ បុរសល្អទាំងនោះ គេនឹងសំលឹងមើលតែរូបសម្បត្តិរបស់នាងតែម្យ៉ាងទេមែនទេ?
ចូរចងចាំពាក្យខ្ញុំចុះ រូបសម្ភស្សស្អាតទុកគ្រាន់កំដរ មានអត្តចរិតល្អទុកជាគូគ្រង បើសិនជាល្អ ហើយថែមស្អាតផង ងាប់ក្នុងបង្គងល្អងដោយពិត។
[1] ងាប់ក្រោមកន្ទុយក្បិន សំដោះដល់ការស្រលាញ់ងប់ ទៅណាមិនកើត ធ្វើអ្វីមិនបាន
