បន្ទប់ការិយាល័យរបស់អ្នកអាចជាកន្លែងដ៏ក្តៅគគុក ទោះជាអ្នកស្ថិតនៅក្រោមម៉ាស៊ីនត្រជាក់។ បន្ទប់ការិយាល័យរបស់អ្នកអាចជាសមរភូមិប្រយុទ្ធដ៏សាហាវបំផុត ហើយសមរភូមិគឺមិនមែនជាកន្លែងដែលនារីៗចូលចិត្តនោះទេ ប៉ុន្តែបើសិនជានារីៗបានចូលទៅក្នុងសមរភូមិនោះហើយ តើត្រូវធ្វើដូចម្តេច?
មូលហេតុសំខាន់តែមួយគត់ គឺកន្លែងការងារមួយចំនួនធំ នៅតែមានការបែងចែករវាងបុគ្គលិកនារី និងបុគ្គលិកបុរសនៅឡើយ ព្រោះហេតុផលថា បុគ្គលិកនារីទំនងធ្វើការងារផ្នែកសកម្មមិនកើតទេ គឺអាចត្រឹមការធ្វើជាអ្នកផ្តល់ប្រឹក្សាជាដើម។ ទាំងនេះមិនមែនជាអ្វីដែលនារីៗត្រូវការទេនៅសម័យនេះ ព្រោះនារីៗពិតណាស់ គឺមានសមត្ថភាពស្មើបុរស ឬលើសពីបុរសទៀតផង។ ខាងក្រោមនេះ គឺជាគន្លឹះខ្លះៗ ដើម្បីជួយអ្នកក្នុងការទទួលបានជោគជ័យនៅក្នុងកន្លែងការងារ ៖
១. ស្វែងយល់ពីបុរស
ជាដំបូង អ្នកត្រូវបែកចែកសុខទុក្ខជាមួយពួកបុរសៗ ដូចជាការយកចិត្តទុកដាក់នឹងគេក្នុងម៉ោងញាំបាយ ញាំកាហ្វេជាដើម។ បុរសៗនឹងចាប់អារម្មណ៍ថា អ្នកគឺជានារីម្នាក់ដែលមានភាពក្លៀវក្លាក្នុងការងារ ប៉ុន្តែអ្នកងាយនិងទទួលបានការវាយប្រហារពីភាគីនារីៗដូចគ្នា ដែលផ្តើមចេញពីរឿងមួយចំនួនដូចជា ចិត្តងាយ… អាសអាគ្រាម… ជាដើម។
២.ត្រៀមខ្លួនដើម្បីប្រជែង
ដើម្បី គេចផុតពីពាក្យនិន្ទា អ្នកត្រូវកុំព្យាយាមបង្ហាញទំនាក់ទំនងក្នុងកន្លែងស្ងាត់ជាមួយពួក បុរសណាម្នាក់នៅក្នុងការិយាល័យ ឬក្រៅការិយាល័យអោយសោះ ប៉ុន្តែអ្នកអាចបង្ហាញទំនាក់ទំនងរបស់អ្នកជាមួយគេនៅក្នុងអង្គ ប្រជុំធំ ឬក្នុងពេលប្រតិបត្តិការងារជាដើម។ អ្នកត្រូវស្វែងយល់អោយច្បាស់ពីកម្រិត និងថាមពលរបស់បុរសក្នុងពេលបំពេញការងារ បន្ទាប់មកអ្នកត្រូវធ្វើការប្រកួតប្រជែង។
៣. កុំធ្វើតាមអារម្មណ៍
ជាធម្មតា នារីៗ ត្រូវគេដឹងថា ធ្វើការទៅតាមអារម្មណ៍ទន់ជ្រាយ និងផ្តេកផ្តួល ដូច្នេះអ្នកជានារីត្រូវកុំយកអារម្មណ៍ទាំងនោះមកធ្វើអោយប៉ះពាល់ ក្នុងកន្លែងការងារ ព្រោះមិនដូច្នេះគេ(ចៅហ្វាយ)នឹងផ្តល់តំលៃថ្មីមួយអោយអ្នកជាមិនខាន។ អ្នកត្រូវចាំថា ការសម្រេចចិត្តក្នុងពេលប្រតិតប្តិការងារ គឺជាការសម្រេចចិត្តស្លាប់រស់របស់ស្ថាប័ន និងមនុស្សក្នុងស្ថាប័ននោះ ដូច្នេះអ្នកមិនអាចព្រោះតែអារម្មណ៍ផ្ទាល់ខ្លួន ធ្វើអោយប៉ះពាល់ដល់ស្ថាប័ននោះទេ។
៤. សម្រេចចិត្តដោយសុភវិនិច្ឆ័យ
កុំធ្វើការសម្រេចចិត្ត ដោយខ្វះការវិភាគវិនិច្ឆ័យ ជាពិសេសទៅទៀតសូមកុំបង្កើតបក្សពួក ឬផ្តល់ការយោគយល់ចំពោះបុគ្គលណាម្នាក់នៅកន្លែងធ្វើការអោយសោះ។ ផលប៉ះពាល់ធំបំផុតក្នុងកន្លែងការងាររបស់អ្នក គឺការបង្កើតក្រុម បក្សពួក ឬហួសពីនេះទៅទៀតគឺការមានស្នេហាក្នុងការិយាល័យ ដែលមិនត្រូវបានគេអនុញ្ញាតិ។ បើសិនជាអ្នកបណ្តោយខ្លួនអោយមានរឿងណាមួយក្នុងចំណោមរឿងទាំងនោះកើត ឡើងក្នុងការិយាល័យរបស់អ្នក នោះអ្នកនឹងមិនអាចត្រូវគេលើកទឹកចិត្ត អោយឡើងតំនែងជាដាច់ខាត។ អ្នកត្រូវចាំថា ការបង្កើតក្រុមបក្សពួក ឬមានស្នេហាក្នុងការិយាល័យ គឺជាសត្រូវធំបំផុតក្នុងការឈានទៅរកភាពជោគជ័យក្នុងការងាររបស់អ្នក។ ត្រូវជៀសវាងអោយបាន ឬបើមិនអាចទេ (បើមានស្នេហា) ត្រូវមានម្នាក់ណាក្នុងចំណោមអ្នកទាំងពីរ ចាកចេញអោយដាច់ស្រឡះ។
៥. ចាត់ទុកអ្នកធ្វើការជាសមាជិកគ្រួសារ
ត្រូវ ធ្វើជាម្តាយបើមានអ្នកណាម្នាក់មានបញ្ហា មានន័យថា អ្នកត្រូវចេះលួងលោម ថ្នាក់ថ្នម លើកទឹកចិត្តដូចជាម្តាយអ្នកតែងធ្វើចំពោះអ្នក… ត្រូវធ្វើជាបងស្រី បើមានអ្នកណាម្នាក់ត្រូវគេធ្វើបាប មានន័យថា អ្នកត្រូវហ៊ានចេញមុខដោះស្រាយ ចេញមុខការពារអោយអស់ពីលទ្ធភាពដែលអ្នកអាចធ្វើបាន ដូចជាអ្នកការពារប្អូនៗរបស់អ្នក… ត្រូវធ្វើជាប្អូនស្រីបើសិនអ្នកណាម្នាក់នឿយហត់ អស់កំលាំង និងបាត់បង់ឆន្ទៈ មានន័យថា អ្នកត្រូវចេះរំអុក កំប្លែង ម្ញ៉ិកម្ញ៉ក់ ធ្វើអោយគេសើចសប្បាយ រីករាយ ដូចជាអ្នកតែងរំអួយដាក់បងប្រុសបង្កើតរបស់អ្នកអញ្ចឹងដែរ។
៦.មិនត្រូវបោះបង់
ពេល ដែលអ្នកជួបរឿងបរាជ័យ សូមអ្នកកុំបោះបង់វាអោយសោះ អ្នកត្រូវស្វែងរកអោយឃើញពីមូលហេតុ ហើយចាប់ផ្តើមវាសារឡើងវីញប្រកបដោយឆន្ទះ។
