បណ្តាសារ គឺជាពាក្យប្រកាសជាឪឡារិក អោយនរណាម្នាក់ទទូលរងគ្រោះ ឬដាក់ទណ្ឌកម្ម តាមអ្វីដែលជាម្ចាស់បណ្តាសារខឹង ឬខកបំណង។ វាត្រូវបានកំណត់ថាជាទង្វើអាក្រក់ ពីព្រោះវានឹងដឹកនាំឲ្យមានវិនាសកម្មដោយប្រការផ្សេងៗ។
ជាទូទៅ អ្នកដែលអាចដាក់បណ្តាសារគេបាន ភាគច្រើនគឺជាជនដែលងប់ងល់និងកំហឹង អំណាច ឬឬទ្ធានុភាពបែបហឹង្សា ដូចជាអ្នកចេះមន្តអាគម អាប ធ្មប់ គន្ធប យក្សា ជាដើម ពីព្រោះ ពាក្យបណ្តាសារ បើតាមជំនឿ គឺត្រូវធ្វើឡើងដោយការប្រសិទ្ធីនូវពាក្យមន្តអាគម គាថា យ័ន និយាយដោយពាក្យសច្ចាក្តី សរសេរក្តី ឬធ្វើជារូបតំណាងក្តី ចំពោះជនណាដែលគេកំណត់។
តើវាពិតដែរទេ?
រឿងពិត ឬមិនពិតនោះ យើងពិបាកក្នុងការបកស្រាយណាស់ ពីព្រោះរឿងរ៉ាវមួយចំនួនដែលបានកើតឡើង ពេលខ្លះវាដូចជាកើតឡើងតាមពាក្យបណ្តាសារ ដូចជាព្រះអង្គម្ចាស់ Carnarvon របស់អង់គ្លេស ដែលបានសោយទីវង្គតព្រោះតែមូសតូចមួយខាំជាដើម។
រឿងរ៉ាវបានកើតឡើងយ៉ាងនេះ…. កាលពីថ្ងៃទី ១៦ ខែកុម្ភៈ ឆ្នាំ ១៩២៣ អ្នកជំនាញប្រវត្តិសាស្រ្តជនជាតិ អេស្ស៊ីប សញ្ជាតិអង់គ្លេស Howard Carter និងព្រះអង្គម្ចាស់ Carnarvon (ស្តាំក្នុងរូប) បានសម្រេចវាយបំបែកមាត់ទ្វារនៃផ្នូរបញ្ចុះសពរបស់ស្តេច Pharaoh Tutankhamun ដែលបានស្លាប់ក្នុងកំឡុងឆ្នាំ ១៣២៣មុនគ.ស ក្នុងអាយុប្រហែល១៨ឆ្នាំ នៅក្នុងជ្រលងភ្នំនៃស្តេចអេស្ស៊ីប។ មនុស្សមួយចំនួនមានជំនឿថា ការបើកផ្នូរដែលគេបានរក្សាការពារ មិនប៉ះពាល់អស់ពេលជាង ៤ពាន់ឆ្នាំមកនោះ គឺដូចជាលែងបណ្តាសារនៃស្តេច Pharaohs ដែលក្រោយមកត្រូវគេហៅថា បណ្តាសារស្តេច Tut វិញ។ គេនិយាយថា គ្រោះមហន្តរាយនឹងកើតឡើង បើសិនជាគេទៅរំខានដល់ផ្នូរសាកសព (ម៉ាំមី) របស់ជនជាតិអេស្ស៊ីបបុរាណ។ ប្រហែល៦សប្តាហ៍ក្រោយការបើកច្រកផ្នូរនោះ ព្រះអង្គម្ចាស់ Carnarvon ដែលជាអ្នកចេញប្រាក់ក្នុងបេសកកម្មវាយបំបែកច្រកផ្នូរនោះ បានសោយទីវង្គត ដោយសារតែមូសខាំលើថ្ពាល់ ហើយវាកាន់តែធ្ងន់ធ្ងក្រោយពេលកោរពុកមាត់លើស្នាមមូសខាំនោះ។ វាក៏បានបង្ករទៅជារបួសដែលមានជាតិពិសរលាយចូលក្នុងឈាម ធ្វើឲ្យរលាកសួត ហើយសោយទីវង្គត់ទៅ។
នៅក្នុងរូបថត លោកអ្នកអាចមើលឃើញ សំណល់នៃជញ្ជាំងដែលគេប្រើប្រាស់ថ្មភក់មកបិតច្រកចូលទៅកាន់ផ្នូរបស់ស្តេច Pharaoh Tutankhamun នៅសល់ត្រឹមជង្គង់របស់ព្រះអង្គម្ចាស់ Carnarvon និង Howard Cartel។ ច្រកទ្វារនេះឯងដែលគេជឿថា វាគឺជាផ្ទាំងបណ្តាសារ។
ជាការពិត ក្រុមរបស់លោក Carter និងព្រះអង្គម្ចាស់ Carnarvon បានចូលទៅរកឃើញផ្នូររបស់ Pharaoh Tutankhamun មុនគេ ជាមួយនឹងរតនសម្បត្តិជាច្រើនទៀតដែលដាក់ជាមួយនោះ។
គ្មានពាក្យបណ្តាសារណាមួយត្រូវបានរកឃើញទេ ប៉ុន្តែការស្លាប់ជាបន្តបន្ទាប់នៃក្រុមរបស់លោក Carter បានធ្វើឲ្យជំនឿនៃបណ្តាសារនោះនៅតែមានប្រសិទ្ធភាព។ ជនរងគ្រោះ ដែលស្លាប់បន្ទាប់ពីព្រះអង្គម្ចាស់ Carnarvon មានដូចជា ព្រះអង្គម្ចាស់ Ali Kamel Fahmy Bey ដែលត្រូវបានបាញ់សម្លាប់ដោយមហេសីរបស់ទ្រង់នៅឆ្នាំ ១៩២៣។ លោកដុកទ័រ Archibald Douglas Reid ដែលជាអ្នកថត X-Rays លើសាកសពបានស្លាប់ដោយអាថ៌កំបាំងក្នុងឆ្នាំ ១៩២៤។ លោក Lee Stack មន្ត្រីសាធារណៈនៃប្រទេសសូដង់ ដែលត្រូវបានគេសម្លាប់នៅទីក្រុង Cairo ប្រទេសអេស្ស៊ីប នៅឆ្នាំ ១៩២៤។ ក្នុងនោះ អ្នកនិពន្ធ ចងក្រងសកម្មភាពរបស់ក្រុមលោក Carter គឺ អ្នកនិពន្ធ Mace ត្រូវបានស្លាប់ដោយសារការពុលអាសេនិកនៅឆ្នាំ ១៩២៨។ ចំនែកលោកលេខារបស់លោក Carter គឺលោក Richard Bethell ត្រូវបានគេប្រទះឃើញស្លាប់នៅលើគ្រែរបស់គាត់នៅក្នុងឆ្នាំ ១៩២៩ ចំនែកឳពុករបស់លោកត្រូវបានគេដឹងថា បានធ្វើអត្តឃាតនៅឆ្នាំ ១៩៣០។
មនុស្សភាគច្រើនដែលធ្វើការនៅក្នុង ឬទៅទស្សនាផ្នូរនោះ មានជីវិតរស់នៅបានយូរ ប៉ុន្តែនេះមិនបានធ្វើឱ្យខូចដល់ជំនឿលើបណ្តាសារបស់អ្នកដែលចង់ជឿនោះទេ។ លោក Carter ខ្លួនឯងបានច្រានចោលគំនិតដាក់បណ្តាសាទាំងស្រុងថា ជា ‘Tommy Rot មានន័យថា រឿងគ្មានបានការ’ ប៉ុន្តែនៅពេលដែលគាត់បានស្លាប់ដោយឯកោ និងសោកសៅដោយជំងឺ Hodgkin ក្នុងផ្ទះល្វែងរបស់គាត់ក្នុងទីក្រុងឡុងដ៍ក្នុងខែមីនា ឆ្នាំ 1939 ក្នុងអាយុ 64 ឆ្នាំ រឿងរ៉ាវនៃបណ្តាសារបស់ម៉ាំមីបានផ្ទុះឡើងឡើងវិញ ហើយវាបានបន្តរហូតដល់សព្វថ្ងៃ។
ដូច្នេះ ក្រោយការស្វែងយករឿងរ៉ាវខាងលើហើយ លោកអ្នកអាចជឿ ឬមិនជឿក៏បាន ចំពោះរឿងរ៉ាវនៃពាក្យបណ្តាសារ ប៉ុន្តែពាក្យខ្មែរមួយខ្លាដែលគេតែនិយាយលេងថា «មិនជឿកុំប្រមាថ»៕
