នៅគ្រាដែលមនុស្សចង់រស់នៅប្រកបដោយសុខសន្តិភាព ភាពហ៊ឺហារ ទាន់សម័យ មនុស្សត្រូវប្រឈមមុខនឹងការប្រកបរបរមួយចំនួនដែលមិនមែនជាក្តីសុបិន្តរបស់ខ្លួន មិនមែនជាឧត្តមគតិរបស់ខ្លួន។ តើអ្នកកំពុងធ្វើកិច្ចការដែលមិនមែនជាក្តីសុបិន្តរបស់ខ្លួន មែនទេ?
ជារឿងពិត មនុស្សម្នាក់ៗតែងប្រាថ្នាចង់បានជីវិតមួយដែលប្រកបដោយ សុខសុភមង្គល ព្រោះមនុស្សគ្រប់រូបតែងតែជួបនូវទុក្ខកង្វល់ ដែលកង្វល់និងក្តីទុក្ខទាំងនោះកើតចេញពីបរិយាកាសដែលគេកំពុងរស់នៅ មានស្ថានភាពគ្រួសារ ស្ថានភាពបុគ្គល និងស្ថានភាពសង្គមទាំងមូល។ ស្ថានភាពទាំងនោះនឹងជំរុញជីវិតមនុស្សអោយដើរលើផ្លូវ របស់ខ្លួន ជាសុខក្តី ជាទុក្ខក្តី។
សូមកុំបារម្ភចំពោះការងារដែលអ្នកកំពុងធ្វើ ទោះជាវាមិនមែនជាឧត្តមគតិ ឬជាគោលបំណងក្នុងឆាកជីវិតរបស់អ្នកក៏ដោយ សូមធ្វើវាឲ្យល្អ ធ្វើវាដោយស្មោះស្មគ្រ និងសម្រេចសមិទ្ធផលឲ្យគាប់ប្រសើរ ពេលនោះអ្នកនឹងដឹងថា ការងារដែលកំពុងធ្វើនេះ បានក្លាយជាការងារឧត្តមគតិ និងក្តីសុបិន្តរបស់អ្នកដោយពុំដឹងខ្លួន។ មានកត្តា២ដែលកំណត់សកម្មភាពរបស់មនុស្ស នោះគឺ កត្តាវេទនា និងកត្តាផលប្រយោជន៍។ វាមានទំនាក់ទំនងតាមរយៈបទពិសោធន៍ និងភាពប៉ិនប្រសប់របស់បុគ្គលម្នាក់ៗ។
អ្នកធ្វើការមួយដែលមិនមែនជាក្តីសុបិន្ត មិនមែនជាឧត្តមគតិ តែអ្នកទទួលបានផលប្រយោជន៍ពីការងារនោះ ដូចជាអាចទទួលបានទំនាក់ទំនងល្អក្នុងសង្គម ទទួលបានប្រាក់ខែច្រើន និងអត្ថប្រយោជន៍ផ្សេងៗជាច្រើនជាដើម ដូច្នេះអ្នកត្រូវខំប្រឹងប្រែងធ្វើវារហូតក្លាយជាបទពិសោធន៌៍ និងភាពប៉ិនប្រសព្វ ឬហៅថា ឯកទេស ពេលនោះ អ្នកឈ្មោះថាកំពុងស្ថិតក្នុងកត្តាផលប្រយោជន៍។ ដោយឡែកអ្នកដែលធ្វើការស្របតាមឧត្តមគតិ និងក្តីសុបិន្ត ទោះជាទទួលបានផលប្រយោជន៍តិច ប្រាក់ខែ ឬប្រាក់ចំណូលតិច តែអ្នកពេញចិត្តធ្វើវា ហើយធ្វើវាដោយមិនធុញទ្រាន់ ដោយមិនសំលឹងរកផលប្រយោជន៍ជាធំ កាលនោះ ឈ្មោះថាអ្នកកំពុងស្ថិតនៅក្នុងកត្តាវេទនា។
ដូច្នេះ សូមកុំអស់សង្ឍឹមនឹងអ្វីដែលខ្លួនអ្នកកំពុងធ្វើ ចូរខិតខំធ្វើវាឡើង ពុះពារអោយក្លាយជាទម្លាប់របស់អ្នក នៅពេលនោះ អ្នកនឹងអាចមើលឃើញថា ឧត្តមគតិរបស់ចាប់ផ្តើមប្រែប្រួល តាមរយៈជំនាញថ្មីដែលអ្នកកំពុងតែធ្វើវា។
សរុបមក នៅពេលដែលកត្តាផលប្រយោជន៍បានក្លាយជាភាពប៉ិនប្រសប់ និងបទពិសោធន៍ វានឹងក្លាយជាកត្តាវេទនា ហើយកត្តាវេទនា នៅពេលដែលសមិទ្ធផលនៃការខិតខំប្រឹងប្រែងទទួលបានផលប្រយោជន៍ វាក៏នឹងក្លាយជាកត្តាផលប្រយោជន៍វិញដូចគ្នា។
ដូច្នេះ ការងារទោះខុសឧត្តមគតិ ឬត្រូវតាមឧត្តមគតិ ឲ្យតែមិនធ្វើឲ្យប៉ះពាល់ប្រយោជន៍អ្នកដទៃ លោកទុកជាការងារល្អប្រសើរ។ ចូរខិតខំបំពេញការងារល្អ ពេលនោះសេចក្តីសុខនឹងកើតឡើងយ៉ាងប្រាកដ។
