មនុស្សចូលចិត្តយកឆាកជីវិតខ្លួនឯងមកធ្វើជាដើមទុន ទាំងការរកស៊ី ស្នេហា និងអាពាហ៍ពិពាហ៍។ នៅពេលដែលរឿងរ៉ាវស្រាប់តែខកបំណង គេក៏នាំគ្នាបន្ទោសថា ហេតុអ្វីឆាកជីវិតនេះ ជួបរឿងបែបហ្នឹង?
ពេលខ្លះគេបន្ទោសទៅលើពេលវេលា និងស្ថានភាពសង្គម ទើបរុញជីវិតរបស់គេអោយជួបរឿងខកបំណង ប៉ុន្តែមានអ្នកប្រាជ្ញច្រើនណាស់បានស្វែងយល់អំពីរឿងនេះ។ លោកវិទូទាំងនោះយល់ដូចៗគ្នាថា មនុស្សដែលចេះប្រើប្រាស់ដើមទុនស្របតាមពេលវេលា និងគោលបំណងបុគ្គល គឺជាអ្នកឈ្នះរហូត ទោះជាពេលខ្លះជ័យជំនះរបស់គេបានមកពីគំនិតជិះជាន់ កេងប្រវ័ញ្ច ឬកាប់សម្លាប់ក៏ដោយ។
អ្នកអាចជោគជ័យទាំងពីររឿង ទាំងរឿងល្អ និងរឿងអាក្រក់ ក៏ព្រោះតែអ្នកព្យាយាមដើម្បីសម្រេចគោលបំណង ប៉ុន្តែជាលទ្ធផល អ្នកដែលជោគជ័យដោយផ្លូវអបាយ នឹងទទួលបានការកាត់ក្តីផ្សេង ឯអ្នកដែលជោគជ័យដោយផ្លូវសុចរិត នឹងទទួលការកាត់ក្តីផ្សេង។
សូមប្រើប្រាស់ពេលវេលាល្អៗរបស់អ្នកដើម្បីធ្វើជាដើមទុន កើតជាមនុស្ស បានរស់ជាមនុស្ស អាចមានស្នេហាតាមបែបមនុស្ស គឺជាផលបុណ្យអតីតជាតិរបស់អ្នក ដូច្នេះអ្នកមិនត្រូវប្រើប្រាស់ផលបុណ្យទាំងនោះ មកសាងអំពើបាបផ្សេងៗនោះឡើយ។
