បទពាក្យ៨
បារម្ភអូនពេកដេកស្រក់ទឹកភ្នែក
ព្រួយខ្លាចពៅបែក ចែកស្នេហ៍បងឆ្ងាយ
ព្រួយគេមិនល្អ អោយស្រីខ្វល់ខ្វាយ
ព្រួយខ្លាចឆោមឆាយ រងទឹកនេត្រា។
អាណិតចិត្តស្រីក្នុងក្តីកង្វល់
ចុកចាប់រចល់កង្វល់សោកា
មិនដឹងជ្រើសរក យកផ្លូវមួយណា
ម្ខាងជាមាតា ម្ខាងជាចិត្តស្នេហ៍។
ចិត្តស្នេហ៍ធំពិត ចិត្តម្តាយសែនជ្រៅ
ទឹកភ្នែកស្រីពៅ លង់ជ្រៅឥតល្ហែ
ចង់បានសេរី តែខ្លាចគុណម៉ែ
ចង់នៅនិត្យក្បែរ តែខ្លាចកាយកម្ម។
កើតមកមិនចង់ លង់ក្នុងវិយោគ
អូនអើយក្តីសោក វាក្លាយជាស៊ាំ
បងសូមលន់តួរអង្វរបណ្តាំ
ទោះយូរខែឆ្នាំ បូជាស្នេហ៍ស្មោះ។
បើថ្ងៃនេះបែក ស្អែកបងលាស្រី
លាឈប់វិលវៃ លាមិនស្រណោះ
បេះដូងតែមួយ បោះបង់វាចុះ
ប្តូរយកស្នេហ៍ស្មោះ ចំពោះជីវ៉ា។
ជូនពរនួននាង បាននៅសុខសាន្ត
គាប់កណ្យាណបានសោយសុខា
ផ្គាប់ម្តាយឆ្ងាយបងមិនខុសទោសា
បងស្មោះជីវ៉ា…. ប្រាថ្នាជាតិក្រោយ៕
កំណាព្យនេះខ្ញុំបានតែងឡើងក្នុងឆ្នាំ ២០១៤ តាមការស្នើសុំរបស់មិត្តម្នាក់ ផ្ញើជូនអតីតមិត្តស្រីរបស់គាត់ តែធ្វើតាមម្តាយរៀបការនិងបុរសថ្មី។
