អំពើ «ផិត» គឺជាការលួចលាក់មានស្នេហាខុសគន្លង ទៅលើប្តីប្រពន្ធកូនអ្នកដទៃ។ អំពើ «ក្បត់» គឺជាការលះបង់ដៃគូចាស់ ចាប់យកដៃគូថ្មីដោយហេតុផល ផលប្រយោជន៌ ស្នេហា ឬនិន្នាការផ្សេងៗ។ សរុបពាក្យទាំងពីរចូលគ្នា អំពើ «ផិតក្បត់» គឺជាការលបលួច លះបង់ស្នេហាចាស់ ផ្លាស់យកស្នេហាថ្មី ដោយលាក់កំបាំងក្តី ដោយចំហរក្តី នេះបើតាមការបកស្រាយក្រៅផ្លូវការរបស់អ្នកនិពន្ធ។
អំពើ ផិតក្បត់ មិនត្រូវបានគេចាត់ទុកជាអំពើល្អប្រសើរនោះទេ ហើយរូបភាពនៃអំពើផិតក្បត់គេច្រើនសំដៅទៅលើស្រ្តីដែលមានដៃគូស្នេហាហើយ ហើយទៅលបលួចមានដៃគូថ្មី គេហៅថា ស្រីផិត រឺស្រីក្បត់ រឺស្រីផិតក្បត់។ ចំនែកបុរសវិញ គេច្រើនប្រើពាក្យ «ទៅមានស្រី» វិញ តែពាក្យពីរនេះមានន័យដូចគ្នា។
ថ្ងៃនេះ សិរីសួស្តី សូមលើកយកអំណៈអំណាងមួយទៀត ដែលសំដៅចំពោះបុរសណា ដែលមិនត្រេកអរនិងប្រពន្ធរបស់ខ្លួនឯង ហើយទៅលបលួចលាក់មានស្រីផ្សេងនៅខាងក្រៅ លោកចាត់ទុកទង្វើនេះថា ជា «វិនាសរបស់បុរស» ដែលស្ថិតនៅក្នុងប្រការទី៩នៃ បរាភវសូត្រ មានសេចក្តីដូចខាងក្រោម..៖
ប្រុសមិនត្រេកអរ និងប្រពន្ធខ្លួន ហើយទៅជួបជួន និងស្រីពេស្យា នាំយកស្រីក្មេងមកធ្វើភរិយា ហេតុនោះទៅជា នាំអោយវិនាស…
បរាភវសូត្រ
តាមច្បាប់ធម្មជាតិ ការរួមភេទគឺជាកាតព្វកិច្ចរបស់មនុស្ស, សត្វ និង រុក្ខជាតិដើម្បីបន្តពូជពង្សមនុស្ស, សត្វ និង រុក្ខជាតិនោះនៅលើផែនដី ។ ចំពោះមនុស្ស ការរួមភេទដើរតួលើសពីការបន្តពូជពង្សទៀត។ សត្វ និង រុក្ខជាតិមានពេលវេលារបស់ពួកគេក្នុងការរួមភេទដើម្បីបន្តពូជពង្សរបស់គេ។ ប៉ុន្តែចំពោះមនុស្សវិញគ្មានរដូវកាលទេ មនុស្សរួមភេទដើម្បីជាការកម្សាន្តសប្បាយ ឬពង្រឹងចំណងមិត្តភាពរវាងស្វាមីនិងភរិយា ឬដើម្បីបំពេញចំណង់ត្រេកត្រអាល។ ជាធម្មជាតិ មនុស្សប្រុសក៏ដូចជាសត្វឈ្មោលដែរ ពួកគេរមែងចង់រួមភេទជាមួយនឹងមនុស្សស្រីច្រើនរូប ព្រោះចំណង់ក្នុងការបន្តពូជរបស់ខ្លួនផង និង ការកម្សាន្តសប្បាយផង ។
ឯការរស់នៅជាគូស្វាមីភរិយាមួយទល់នឹងមួយ គឺជារឿងរបស់មនុស្សសម័យទំនើបនៅក្នុងវប្បធម៌របស់មនុស្សមួយភាគធំ ។ នៅក្នុងវប្បធម៌នៃជនជាតិខ្លះៗ មនុស្សប្រុសមានសិទ្ធជ្រើសយកមនុស្សស្រីច្រើនរូបមកធ្វើជាភរិយា ឧទាហរណ៍នៅក្នុងវប្បធម៌របស់ជនជាតិដែលកាន់សាសនាអ៊ីស្លាម ឬពួកអ្នកកាន់សាសនាគ្រឹស្តនៃនិកាយម៉័រម៉ឺន ឬនិកាយស្មបន្ទាល់ព្រះយេហូវ៉ាជាដើម។ ចំពោះមនុស្សប្រុសដែលរស់នៅក្នុងបណ្តាប្រទេសដែលមានច្បាប់ហាមឃាត់ឲ្យមានតែប្តីឬប្រពន្ធមួយ ថ្វីត្បិតតែពួកគេមិនយកប្រពន្ធច្រើនមែន ប៉ុន្តែពួកគេបែរជាអាចទៅរួមភេទជាមួយស្ត្រីរកស៊ីផ្លូវភេទដើម្បីកម្សាន្តសប្បាយ ឬទៅលួចលាក់សាហាយស្មន់និងស្រីច្រើនរូបជាដើម។ ការធ្វើដូច្នោះនឹងនាំឲ្យមនុស្សប្រុសទាំងនោះបង់ខាតទ្រព្យសម្បត្តិ និង ពេលវេលា ថែមទាំងកើតជំងឺឆ្លងតាមផ្លូវភេទដូចជា ជំងឺស្វាយ ប្រមេះ ឬអេដស៍ជាដើមផង ។ ដូច្នេះហើយទើបព្រះពុទ្ធទ្រង់ទូន្មានថា បុរសដែលមិនត្រេកអរនឹងប្រពន្ធខ្លួន គឺជាប្រមុខនៃក្តិវិនាស ស្ថិតក្នុងប្រការទី៩ នោះឯង៕
