ពិតណាស់ ការសេពគប់មិត្តភក្តិ បើមិត្តល្អនិងនាំអោយយើងចំរើន បើមិនល្អនឹងនាំអោយយើងវិនាស។ ក៏ដូចជាការជ្រើសរ់ើសដៃគូជីវិត គឺសំខាន់ជាងដៃគូមិត្តភក្តិទៅទៀត ព្រោះយើងត្រូវធ្វើដំណើរឆ្លងកាត់រឿងរ៉ាវគ្រប់បែបយ៉ាងជាមួយអ្នកនោះ ចឹងបើសិនជាជ្រើសរើសខុស នោះគឺជាសេចក្តីវិនាសដោយពិតប្រាកដ។
ព្រះពុទ្ធបានប្រៀនប្រដៅសត្វលោកឲ្យចេះសេពគប់មិត្តល្អ ព្រោះមិត្តល្អ តែងត្រេកអរ និងដឹកនាំយើងឲ្យដើរលើផ្លូវត្រឹមត្រូវជានិច្ច។ ចូរកុំព្យាយាមលើកតម្កើង ឬធ្វើទំនាក់ទំនងបុគ្គលមួយចំនួនដូចខាងក្រោម…៖
- មិត្តដែលគិតតែប្រយោជន៍ផ្ទាល់ខ្លួន
- មិត្តដែលល្អតែនៅនិងមុខ (បានតែសម្តី)
- មិត្តដែលចេះតែហៃអើ (ចាក់បណ្តោយ) គាំទ្រតែអំពើអាក្រក់
- មិត្តដែលតែងនាំយើងឲ្យលេងល្បែងពាលាផ្សេងៗ
នៅក្នុងបរាភវសូត្រ ត្រង់ប្រការទី១១បានលើកឡើងថា..
បុរសតាំងស្រីអ្នកលេងខ្ជះខ្ជាយ…..ឬស្រីទាំងឡាយតាំងបុរសនោះ
ដែលជាអ្នកលេងខ្ជះខ្ជាយដូច្នោះ…..អំពើទាំងនោះនាំឲ្យវិនាស ។យើងខ្ញុំទាំងឡាយបានដឹងជាក់ស្តែង…..វិនាសនេះឯងព្រោះហេតុដូច្នោះ
វិនាស១២កង
ក្តីវិនាសនេះបើរាប់សង្រ្គោះ…..វិនាសនោះឈ្មោះទី១១ទាន់ហន់ ។
មានសេចក្តីពន្យល់នៅក្នុង វីគីភីឌាភាសាខ្មែរថា «ការសម្រេចចិត្តជ្រើសរើសមនុស្សម្នាក់ធ្វើជាមិត្តភក្តិគឺជារឿងសំខាន់ ។ លើសពីនោះទៀត ការសម្រេចចិត្តជ្រើសរើសមនុស្សប្រុសឬស្រីម្នាក់ធ្វើជាស្វាមី ឬភរិយាពិតជារឿងសំខាន់យ៉ាងខ្លាំងនៅក្នុងជីវិតរបស់គ្រហស្ថ ។ ប្រសិនបើជ្រើសរើសខុស បុគ្គលនោះនឹងជួបប្រទះទុក្ខលំបាកទាំងផ្លូវចិត្ត និង ផ្លូវកាយ ។ ឧទាហរណ៍ ប្រសិនបើបុគ្គលម្នាក់ជ្រើសគូកំណាន់ចិត្តដែលជាមនុស្សល្ងង់ខ្លៅ បុគ្គលនោះនឹងរលាយបង់ទាំងទ្រព្យសម្បត្តិ និង កិត្តិយស ។ ប្រពៃណីខ្មែរ និង ប្រពៃណីជនជាតិមួយចំនួននៅលើពិភពលោក បានបណ្តោយឲ្យឪពុកម្តាយ ឬចាស់ព្រឹទ្ធាចារ្យ ជាអ្នកសម្រេចចិត្តជំនួសយុវជនក្នុងការជ្រើសរើសគូស្រករ ។ ការធ្វើដូច្នេះមិនមែនសុទ្ធតែបានផលល្អគ្រប់ពេលនោះទេ ។ ដូច្នេះ ជនជាបណ្ឌិតគួរជៀសវាងការសម្រេចចិត្តខុសក្នុងការជ្រើសយកមនុស្សប្រុសឬមនុស្សស្រីម្នាក់មកធ្វើជាគូគាប់ ។ នេះគឺជាប្រមុខនៃក្តីវិនាសទី១១។»
ដោយ សិរីសួស្តី
———————
ឯកសារយោង វីគីភីឌាភាសាខ្មែរ
