ការថើបគឺជាសិល្បៈមួយ ក៏ជាប្រពៃណីមួយរបស់មនុស្សជាតិគ្រប់រូបដែរ ហេតុនេះការថើបត្រូវបានគេផ្តល់តំលៃ និងបែងចែកទៅតាមអត្ថន័យ និងកាយវិការរបស់វាយ៉ាងច្បាស់លាស់។ សម្រាប់គូរស្នេហ៍ តើការថើបបែបណាទើបចាត់ទុកថាជាការថើបដ៏អមតៈក្នុងឆាកជីវិត?
វាពិតជារឿងពិបាកក្នុងការផ្តល់តំលៃចំពោះការថើបអ្នកណាម្នាក់ណាស់ ជាពិសេសគឺគូស្នេហ៍របស់អ្នក។ ពេលអ្នករីករាយ ការថើបដៃគូមានអត្ថន័យផ្សេង តែពេលអ្នកកើតទុក្ខការថើបនោះនឹងមានន័យផ្សេង ប៉ុន្តែតើការថើបបែបណាទើបធ្វើឲ្យដៃគូស្នេហាចងចាំយើងរហូត? ប្រធានបទនេះបានផ្តោតសំខាន់ទៅលើ ផ្នែកខាងនារី។
នារីៗទាំងឡាយ គួរណាស់តែមាន ឬពិតជាមានបទពិសោធន៍ផ្ទាល់ខ្លួនចំពោះការថើបបុរសជាគូស្នេហ៍មែនទេ? ដូច្នេះបទពិសោធន៍មួយនេះ អ្នកនាង កញ្ញា ពិតជាអាចបកស្រាយបានថា តើការថើបបែបណាទើបធ្វើឲ្យមានតំលៃ និងផ្តល់ការចងចាំអស់មួយជីវិតសម្រាប់បុរស។ បុរសគ្រប់រូបតែងជាប់ចិត្តនឹងទងបបូរមាត់របស់នារីជាទីស្នេហារបស់ខ្លួន ហេតុនេះ បើបបូរមាត់នាងស្ថិតនៅទីណា ការចងចាំរបស់គេក៏ស្ថិតនៅទីនោះដែរ នេះជាកត្តាជីវសាស្រ្ត និងមនោរម្មណ៍របស់បុរស ដែលនារីៗគ្រប់រូបត្រូវដឹង ដូច្នេះពេលចាប់ផ្តើមថើបគេ ទោះកន្លែងណាក៏ដោយ អ្នកនាង កញ្ញា ត្រូវប្រាកដថា អារម្មណ៍ស្និទ្ធស្នាលពេញបរិបូរគួរទៅជាមួយគ្នានៅទីនោះដែរ។
ជាធម្មតា មិនថាបុរស ឬនារី ការផ្តល់អារម្មណ៍កក់ក្តៅអោយគ្នាទៅវិញទៅមក គឺជាការចងចាំមួយដែលមិនអាចបំភ្លេចបានអស់មួយជីវិត គឺចងចាំដូចជាស្នាមថើបនៃស្នេហាដំបូងរបស់អ្នកចឹងដែរ។ ក្នុងនេះ ការថើបដែលចាត់ទុកជាការថើបដ៏មានន័យ គឺជាការថើបដែលបានផ្តល់នូវអារម្មណ៍កក់ក្តៅក្នុងចិត្ត ជាការថើបដែលធ្វើអោយគេដឹងថា យើងជាអ្នកថើបគឺពិតជាយកចិត្តទុកដាក់និងគេយ៉ាងពិតប្រាកដ។
អ្នកជំនាញជាច្រើនបានផ្តល់តំលៃអោយការថើបដៃគូស្នេហារបស់ខ្លួននៅពេលភ្ញាក់ពីគេង ព្រោះវាជាពេលវេលាដែលមនុស្សពីរនាក់បានជួបគ្នាដំបូងបំផុតក្នុងថ្ងៃថ្មី ដូច្នេះការផ្តល់ស្នាមថើបជាមួយស្នាមញញឹម និងពាក្យ «អរុណសួរស្តី» គឺជារង្វាន់បេះដូងដ៏ពិសិដ្ឋដែលមនុស្សគ្រប់គ្នាគួរទទួលបាន។ វាមិនសំដៅចំពោះតែគូស្នេហ៍ប៉ុណ្ណោះទេ តែក៏អាចធ្វើវាបានចំពោះមនុស្សជាទីស្រលាញ់ដទៃទៀតដូចជា ឳពុកម្តាយ កូនប្រុសស្រី ឬមិត្តសម្លាញ់ផងដែរ។
ដូច្នេះសូមចាប់ផ្តើមបង្កើតទម្លាប់នៃការផ្តល់ស្នាមថើបដ៏មានន័យសម្រាប់ដៃគូស្នេហារបស់ខ្លួនចាប់ពីពេលថ្ងៃនេះទៅ ជាពិសេសនារីៗទាំងឡាយ ដែលចង់អោយបុរសជាគូស្នេហ៍ចងចាំក្នុងចិត្តពេញមួយថ្ងៃ៕
