មនុស្សស្រីភាគច្រើន អោយតែបានរៀបការជាមួយបុរសណាម្នាក់ហើយ នៅពេលដែលបុរសនោះងាករេខុសគន្លង ធ្វើបាបនាងដោយផ្លូវចិត្តក្តី ផ្លូវកាយក្តី នាងតែងទម្លាក់រឿងទាំងនោះទៅលើកម្មផលអតីតរបស់ខ្លួន ដោយមិនបានគិតថា រឿងទាំងនោះជួនកាលមកពីខ្លួនឯងជ្រើសរើសខុស។
រឿងខ្លះទៀត កើតឡើងព្រោះតែអាពាហ៍ពិពាហ៍ដោយការផ្សំផ្គុំពីសំណាក់ឳពុកម្តាយ ឬការចាប់បង្ខំពីនរណាម្នាក់ ពេលដែលវាមិនសមប្រកបតាមចិត្ត នារីៗដ៏កំសត់ទាំងនោះក៏ទុកជីវិតនេះជារបស់ឥតខ្លឹមសារ និងតែងបន្ទោសទៅលើកម្មផលដូចគ្នា។
ពេលខ្លះទង្វើទាំងនោះក៏ទុកថាគួរឲ្យអាណិត ប៉ុន្តែនៅទីនេះ យើងនឹងស្វែងយល់លក្ខណៈបុរស៦ប្រភេទ ដែលនារីៗទាំងឡាយត្រូវតែជៀសអោយផុត បើចង់បានសុខក្នុងឆាកជីវិត។ បុរសទាំងនោះមាន…៖
- បុរសដែលមានចរិតក្មេងស្ទាវ៖ «ចរិតក្មេងស្ទាវ» មិនមែនសំដៅលើបុរសក្មេងស្ទាវទេ។ បុរសប្រភេទនេះ ជាបុរសដែលមិនមានទំនួលខុសត្រូវក្នុងឆាកជីវិតរបស់គេឡើយ គេស្គាល់តែការសប្បាយរីករាយ មានចរិតដូចកូនក្មេង ប៉ុន្តែជួនកាលគេជាមនុស្សដ៏ឃោរឃៅទៀតផង។
- បុរស «ញី» (បុរសដូចស្រី)៖ បុរសប្រភេទនេះ គេស្រលាញ់តែភាពហ៊ឺហារ តុបតែងខ្លួនស្អាតបាត និងមានចរិតមានៈ ឆេវឆាវ និងគ្មានឆន្ទៈពិតប្រាកដក្នុងកិច្ចការឡើយ។ អាចមានដែរ ១ឬ២ ក្នុងចំណោម១ពាន់ ដែលបុរសប្រភេទនេះ មានឋានៈមុខមាត់ក្នុងសង្គម។
- បុរសសម្ភារៈនិយម៖ បុរសប្រភេទនេះ គេឃើញមានច្រើនណាស់។ ជាប្រភេទបុរសដែលស្រលាញ់តែការឡូយឆាយ ចូលចិត្តប្រើប្រាស់របស់ទំនើបៗ អួតអាង មិនដែលខ្វល់ខ្វាយពីអារម្មណ៍របសអ្នកដទៃ ឬយើងអាចហៅថាជាបុរសព្រានក៏បាន។ ជួនកាលបុរសប្រភេទនេះ គេជាប្រភេទបុរសអាត្មានិយម «អញត្រូវជានិច្ច» ទៀតផង។
- បុរស «ម៉ៅស្វិត»៖ បានដល់បុរសដែលកំណាញ់ស្វិត បេះមិនចេញ។ នារីបានភពប្រសព្វនិងបុរសប្រភេទនេះ ក្នុងមួយជីវិតរបស់នាង កុំសង្ឍឹមថា បានស្លៀកពាក់ ឬតុបតែងខ្លួនបានល្អៗ របស់ថ្លៃៗម្តងអោយសោះ។
- បុរសទន់ជ្រាយ គ្មានឆន្ទះ៖ ពាក្យចាស់ពោលថា ត្រូវជ្រើសរើសបុរស «ដើមទ្រូង៥ហត្ថ» ព្រោះបុរសពិតប្រាកដគឺជាបុរសដែលអាចទទួលខុសត្រូវលើវាសនាអនាគតខ្លួនឯង និងដៃគូជីវិតរបស់គេ ប៉ុន្តែសម្រាប់ពួកបុរសដែលទន់ជ្រាយ ងាករេដូចចុងស្រល់វិញ ច្បាស់ណាស់ថា គេនឹងធ្វើតាមការបញ្ជាររបស់ម៉ែឳគេ បើសិនជាមានទំនាស់កើតឡើង។
- បុរសអភេទ៖ និយាយអោយចំ គឺប្រភេទបុរសដែលមិនមានភេទសង្វាសពិតប្រាកដ (បុរសខ្ទើយ ឬបុរសខ្វែក) ជួនកាលក៏មានតម្រេកជាមួយមនុស្សស្រី ជួនកាលក៏មានតម្រេកជាមួយមនុស្សប្រុស៕
