ពាក្យ «ខាន់ស្លា» ត្រូវបានគេប្រើប្រាស់សម្រាប់ ហៅនៅក្នុងពិធីអាពាហ៍ពិពាហ៍ខ្មែរ «កាត់ខាន់ស្លា» ឬចំរៀង «កាត់ខាន់ស្លា» ឬភ្ជាប់គ្នាថា «ជំនូនខាន់ស្លា» ដែលក្មេងៗមួយចំនួននៅមិនទាន់ដឹងថាវាមានន័យយ៉ាងណានោះទេ។
ពាក្យ «ខាន់ស្លា» បើតាមវចនានុក្រមសម្តេចសង្ឍរាជ ជួន ណាត គឺ ( ន. ) ដែលមានន័យថា ប្រាក់ជំនូនដែលមេបាខាងប្រុស ជូនទៅមេបាខាងស្រី ក្នុងវេលាដែលធ្វើអាវាហវិវាហមង្គល ។ ក្នុងច្បាប់ ទសភរិយា លោកកំណត់ត្រឹមតែ ៨ ដេញ គឺប្រមាណ ១២ រៀលខ្មែរ (ជំនាន់ដើម) តែបើនឹងដាក់ច្រើនជាងចំនួននោះក៏បាន។ មានពាក្យភ្ជាប់ថា ប្រាក់ខាន់ស្លា (ទំនៀមបុរាណ) ។ ច្បាប់រដ្ឋប្បវេណី ថាជាប្រាក់បញ្ជាប់ចិត្ត ឬប្រាក់បញ្ចាំចិត្ត ឬថាប្រាក់ថ្លៃទឹកដោះ ក៏បាន។
នៅក្នុងសម័យបច្ចុប្បន្ន ពាក្យជំនូនខាន់ស្លា នៅតែប្រើធម្មតា ហើយហៅតាមទំនៀមចាស់ដដែល ប៉ុន្តែត្រង់ប្រាក់ជំនូនពិតប្រាកដនោះគឺមិនទាបជាង ២ ឬ ៥ ពាន់ដុល្លារអាមេរិកនោះទេ ត្រកូលខ្លះបានជំនូននេះដល់ទៅខ្ទង់ម៉ឺនដុល្លារអាមេរិកក៏មាន គឺអាស្រ័យទៅតាមធនធាន និងវង្សត្រកូលរបស់សាម៉ីខ្លួន៕
