អនុស្សាវរីយ៌ល្អៗ គឺជាឪសថទិព្វសម្រាប់ព្យាបាលភាពរកាំរកូស និងសម្រាប់បង្កើតនូវភាពផ្អែមល្ហែមសម្រាប់គូស្នេហ៍ ហើយក៏ជាគន្លិះនៃការកសាងស្ពានសុភមង្គលផងដែរ។ តើអ្នកជាគូស្នេហ៍បានសាងអនុស្សាវរីយ៍អ្វីខ្លះ សម្រាប់ជីវិតស្នេហា?
ជាការពិតគូស្នេហ៍ខ្លះបានជួបគ្នាដោយចៃដន្យ ខ្លះទៀតបានជួបដោយការផ្គូផ្គង ខ្លះទៀតបានជួបក្នុងពេលបំពេញការងារ ដើរកំសាន្ត ឬការយកអាសារគ្នា ដែលទាំងនេះសុទ្ធតែជាអនុស្សាវរីយ៍មិនអាចបំភ្លេចបាន ប៉ុន្តែនៅទីនេះ យើងសូមលើកយកគំនិតសាមញ្ញៗមួយចំនួន តែមានឥទ្ធិពលចំពោះសុភមង្គល និងការចងចាំជាអមតៈសម្រាប់គូស្នេហ៍មកប្រាប់អ្នកទាំងអស់គ្នា។
- ដើរទិញម្ហូបពេលល្ងាចជាមួយគ្នា៖ ហេតុអ្វីត្រូវជ្រើសរើសការដើរទិញម្ហូបនាពេលល្ងាច? រឿងសំខាន់បំផុតគឺពេលល្ងាច ជាពេលដែលរឿងរ៉ាវស្មុកស្មាញទាំងឡាយត្រូវបានទុកដោយឡែក ជាពេលវេលាល្អសម្រាប់គូស្នេហ៌ធ្វើរឿងជាមួយគ្នា ដូចជាការញាំអាហារ ការដើរកំសាន្តជាដើម។ ជាទូទៅ ការដើរផ្សារទិញម្ហូបពេលល្ងាច ភាគច្រើនត្រូវជាភារៈរបស់នារីៗ ចុះបើសិនបើមានបុរសដើរតាមក្រោយ ជជែកគ្នារឿងគ្រឿងស្លរ ជួយកាន់របស់របរវិញ តើនារីនឹងមានអារម្មណ៍កក់ក្តៅប៉ុណ្ណាដែរ? ចំនែកបុរសវិញ នៅពេលដែលឃើញនារីពូកែខាងរើសមុខម្ហូប បន្លែបង្ការ និងពូកែចាត់ចែងការចាយវាយវិញ តើគេគួរមានមោទនភាពទេ?
- ជួយធ្វើកិច្ចការផ្ទះ៖ ត្រង់ចំនុចនេះ គេច្បាស់ជានឹកឃើញដល់ពាក្យមួយហៅថា «យេនឌ័រ» ព្រោះវាជាគំនិតប្រកាន់ភាពស្មើភាគគ្នា។ ពេលខ្លះភាគីនារីកំពុងជាប់ដៃលាងបន្លែ បុរសក៏អាចជួយបន្ថែមគ្រឿងសម្លរបានដែរតើ.. ដូច្នេះបុរសគ្រប់គ្នា ទោះតិចតួចក្តី គួរតែរៀនធ្វើម្ហូបខ្លះៗ ហើយកិច្ចការផ្សេងទៀតដូចជា លាងចាន ជូតសំអាតតុបាយ រឺកម្រាល រៀបចំបន្ទប់គេងជាដើម.. ជារឿងដែលអាចជួយគ្នាបាន។ ការចេះជួយគ្នារឿងកិច្ចការផ្ទះនេះ នឹងធ្វើអោយចំណងទាក់ទងរបស់អ្នកកាន់តែស្អិតរមួត ទៅណាមកណាតែងបារម្ភថា តើគូស្នេហ៌នៅម្នាក់ឯងយ៉ាងម៉េចហើយ?
- ជូនអំណោយសាមញ្ញៗ៖ អំណោយទោះជាមិនមានតំលៃ តែបានបង្កប់នូវទឹកចិត្តនៅក្នុងនោះ ដូច្នេះគូស្នេហ៍គួរតែរៀបចំអំណោយឲ្យគ្នាទៅវិញទៅមកក្នុងថ្ងៃពិសេស ៗមួយចំនួនដូចជា ខួបកំណើត ខួបអាពាហ៌៍ពិពាហ៍ រឺពិធីបុណ្យផ្សេងៗ.. ចំពោះអំណោយវិញ បើសិនជាអាចធ្វើដោយដៃខ្លួនឯង គឺកាន់តែពិសេស រឺបើមិនអាចធ្វើទេ ក៏គ្រាន់តែជាអំណោយដែលគូស្នេហ៌៍ចង់បានបំផុតទៅបានហើយ។
- ជិះកង់ ឬថ្មើរកំសាន្តពេលល្ងាច៖ ការកំសាន្ត គឺជារឿងដែលមិនអាចខ្វះបាន ដូច្នេះមានមនុស្សជាច្រើនបានជ្រើសរើសការដើរលេងកំសាន្តទៅកាន់ រមណីយដ្ឋាននានា ឆ្ងាយៗ ស្អាតៗ ទំនើបៗ ឬការដើរផ្សារ ទិញទំនិញ មើលកុន លេងហ្ឡេមជាដើម.. ប៉ុន្តែទាំងនោះ នៅតែមិនអាចឈ្នះគំនិតនៃការជិះកង់ និងការថ្មើរជើងកំសាន្តលេង ព្រោះគូស្នេហ៍មានពេលវេលាកៀកកាយគ្នាដោយបើកចំហរ មើលឃើញភាពហេវហត់គ្នាទៅវិញទៅមក ជួយជូតញើសអោយគ្នា ឬជួយបង្រៀនគូស្នេហ៍អោយជិះកង់ បើសិនគាត់/នាងមិនចេះជិះ។
- មើលទូរទស្សន៍ ឬស្តាប់តន្រ្តីនៅផ្ទះ..៖ ពេលខ្លះទីកន្លែងនានា មិនស្មើនឹងផ្ទះរបស់ខ្លួនឯងនោះទេ។ គូស្នេហ៍ប្រាកដជាមានពេលវេលាសម្រាកច្រើន អាចមើលទូរទស្សន៍ ឬស្តាប់តន្ត្រីជាមួយគ្នា ជាមួយរបស់របរដែលទាំងពីរនាក់បានតុបតែងមក។ គូស្នេហ៍អាចប្រលែងគ្នាដោយបើកចំហរ អាចធ្វើអ្វីៗលើសពីការកំសាន្តបានតាមចិត្តចង់..ឬបើមិនមើលទូរទស្សន៍ រឺស្តាប់តន្រ្តី បើអាចលេងតន្រ្តីខ្លួនឯងបានទៀត កាន់តែពិសេស។
- និយាយពាក្យ «បងស្រលាញ់អូន.. អូនស្រលាញ់បង» អោយបានញឹកញាប់៖ យើងទទួលស្គាល់ថា គូស្នេហ៍ជនជាតិខ្មែរ ជាពិសេសអ្នកនៅតាមជនបទ រៀបការជាមួយគ្នាពីក្មេងដល់ចាស់ មិនទាំងធ្លាប់និយាយពាក្យ «បងស្រលាញ់អូន ឬអូនស្រលាញ់បង» ផង.. មិនមែនព្រោះពួកគាត់អៀននិងគ្នាទេ តែអាចមកពីទម្លាប់។ ហេតុនេះ សម្រាប់គូស្នេហ៍វ័យក្មេង អាចនិយាយពាក្យនេះអោយបានញឹកញ៉ាប់ ដើម្បីបង្កើតទំនុកចិត្តខ្លួនឯង និងគូស្នេហ៍ ជាពិសេធ្វើអោយអ្នកទាំងពីរយល់ថាជីវិតមិនអាចខ្ចះគ្នាបាន។
ចំនុចទាំង ៦ ខាងលើនេះ មិនគ្រាន់តែជាចំណុចសាមញ្ញៗនោះទេ តែវាក៏ជាគន្លិះនៃការកសាងទំនាក់ទំនងស្នេហា និងទំនុកចិត្តផងដែរ។ ច្បាស់ណាស់ថា មានភាគរយតិចណាស់ដែលគូស្នេហ៍ជនជាតិខ្មែរបានធ្វើរឿងទាំង៦នោះ។
